هنوريك ال عمرك ما شفته

فى الشغل و بمنتهى البساطه هتشوف ال عمرك فعلا ما شفته و ده لأن معترك الحياه اليوميه والأحتكاك بالناس شىء غريب جداا وبيخلى الواحد يشوف انماط من البشر تخليك مذهول مذهول و لا تقولى سيما ولا تلفزيون
و ال فعلا هيشوف ال عمره ما شافه هو ال ربنا يكرمه ويشتغل فى مكان مفيش فيه الا نساء بس زى حالاتى كده و لانى من انصار عدم عمل المراه الا بضوابط معينه تحترم طبيعتها من حساسيه ورقه ( و ده طبعا راى شخصى ناس كتير مش هتتفق معايا فيه بس زى ما بقول دايما احنا فى بلد حر و كل واحد حر يحلم ويعتقد زى ماهو عايز ) كنت دايما بقول ان افضل حاجه ان الواحد يشتغل فى مكان كله بنات ولما كان حد يقولى انك بتقولى كده علشان مشتغلتيش و ان اسوء شىء انك تتواجدى فى مكان شغل مفيش فيه الا بنات بس كنت اقول لالالا الناس دى بتقول كده من الحرج وعشان تدافع عن فكرتها مش اكتر و الحقيقه انى اتصدمت بأرض الواقع وان كلام الناس كلها طلع صح وحقيقى ان اسوء شىء ف الدنيا ان الواحد يشتغل فى مكان مفيش فيه الا بنات وبس و فعلا تشوووووووف ال عمرك ماشفته مأسااااااااااه بكل ماتحمل الكلمه من معانى
و طبعا نتيجه الصدمه القاتله ال اتعرضت لها و ال خلتنى غيرت وجه نظرى فى كون الواحد يشتغل فى مكان مفيش فيه الا بنات بس لقيتنى بدات احلم حلم جديد بحلم يجى لنا فى فرع المكتب اتنين تلاته مهندسين و اتفرج بقا على طقم البنات دى هيبقوا عاملين ازاى بس الخوف الحلم يبقا حقيقه و يفضلوا ثابتين على مبدء قناه روتانا الشهير هنورك ال عمرك ماشفته