زياره المدير

روحت الأسبوع ال فات يوم الاربعاء واحنا متوقعين ان المدير هيوصل من فرع المكتب فى السعوديه و هيعمل زياره مفاجأه للمكتب عندنا و كل ده توقعات ومكنش فى حاجه مؤكده يعنى المهم انى انا بدات اسبوعى النهارده وانا مفيش عندى مشكله يجى او ميجيش الموضوع بالنسبه لى واحد و نزلت الصبح زى عادتى تمنيه وخمسه ووصلت متاخره التلت ساعه اليوميه كالعاده ومفيش اختلاف
و الصراحه انى وصلت و ملقتش المدير بس لقيت مظاهر الاستعداد القويه جدااا ظاهره على المكتب من اول دقيقه دخلت المهندسات ال بيجو شفت الساعه تمنيه كلهم موجودين ومفيش تاخير و سيد لسه بينضف ودى سابقه من نوعها لانى كل يوم بروح الاقى سيد نايم و مخلص المكتب كله و الحقيقه انى بسيبه نايم لكن الغريبه انه النهارده كان فى غايه النشاط و بيمسح وينضف لدرجه انه مسح المرر اكتر من تلات مرات بالديتول

و الناس كلها برده ال بتيجى شفت الساعه تسعه جايه تسعه بالدقيقه مفيش تاخير ثانيه و حسيت ان المكتب كله مقلوب قمه النشاط و الألتزام مفيش مهندسه قامت من على مكتبها قبل البريك و النهارده اول يوم الناس تزعل ان سيد اخر الاكل لأن وقت البريك هيخلص وهم مش على مكاتبهم مع انه كل يوم الناس بتفضل مش على مكاتبها بعد البريك لكتر من ساعه بس ما علينا مش دى بس النقطه ال استوقفتنى
انا ال استوقفنى فعلا فعلا ان النهارده كان اول يوم المكتب يشهد فيه عدم تشغيل اغانى اطلاقا مطلقا وده لان المدير عنده تعليمات ان ال هيتقفش بيسمع اغانى هيتهزق والأغانى حرام و ممنوعه فى المكان فالنهارده مكنش فى اغانى و مكنش فى صوت عالى ولا ضحك عالى ولا اى حاجه مش مظبوطه كله فى مكانه وكله مظبوط و كله ملتزم و انا مش عارفه كل ده ليه الراجل مش اكيد اكيد انه جاى ده احتمال و كل الناس كل شويه تسال هو جاى ول لاء المهم على الساعه 1 الضهر تاكد الخبر المدير خلاص فى الطريق من القاهره الينا
و الناس ملتزمه و مستنيه اليوم يعدى على خير و فضلنا نستنا و كله على مكتبه لحد الساعه مابقت خمسه ومحدش جه و الصراحه انا شفتى بيخلص خمسه و عاده مش بروح خمسه بالظبط بس النهارده بالذات مضيت خمسه الا خمسه و اول ما الساعه دقت خدت بعضى ومشيت ومكنش حد على دفتر الأمضاء النهارده فى المعاد الا انا وكانهم مستنين انه يجى برده و برده مجاش و صعبوا عليا بعد يوم من الألتزام طلع كله على الأرض لأنه المدير مجاش

و نزلت وانا بفكر واقول كل ده عشان شكوا ان المدير جاى التزام و نشاط طيب ليه ميبقاش كده علطول وكل يوم و ركبت التاكسى ولقيتنى بحلم ان الناس تتغير و ان كل واحد يبقا زى ماهو من غير وشوش ولا تصرفات فى مواقف و تصرفات مختلفه فى موقف تانى و نبقا بنعمل كل حاجه من نفسنا صح من غير ماحد يبقا ورانا ويقولنا ده صح وده غلط و ده ينفع وده مينفعش و نعرف ان ربنا شايفنا طول الوقت وهو ده المهم