خرجت من بيتنا النهارده الصبح من بدرى زى عادتى بس النهارده مكنتش رايحه الشغل النهارده كان عندى مشوار لتخليص ورق حكومى من مصلحه حكوميه و الصراحه انا كنت نازله من بيتنا وانا عندى امل ان الموضوع يخلص بسرعه هو انا واخده ساعه تاخير بالخصم وعندى امل انها مش هتكون اكتر من كده اصل الموضوع بسيط مش محتاج وانا ورقى كله كااااااامل من الأبره ال هيا ختم النسر الى الصاروخ ال هو طابع الدمغه و نزلت وانا بحلم حلم واضح وصريح انى ادخل المكان الاقى الدنيا هاديه و مفيش طوابير و زحمه واخلص بسرعه و امشى و يا سبحان الله و كان الحلم بقا حقيقه دخلت المصلحه هدوء غريب على طول السلم و تقريبا مفيش حد رجعت ابص قلت يمكن انا جيت مكان غلط بس هو العنوان مظبوط طيب معقول دى حقيقه ول خيال وطلعت السلم ودخلت مكتب الموظفين و المفجأه انى ملقتش حتى الموظفين و فضلت ابص فى ساعتى لقيتها تمنيه وربع يعنى انا جايه فى المعاد خرجت بدور لقيت الساعى اتصدم بيا "خير يا استاذه ؟؟" قلت له انا جايه اخلص ورق " ورق ايه لسه بدرى الموظفين بيجوا الساعه تسعه "
تسعه ؟؟!! تسعه ليه الدوام بيبدء الساعه تمنيه وانا سالت وقالوا لى كده لقيته بيقولى " احنا فى الصيف بقا كل سنه وانت طيبه تقدرى تستنى الشويه دول ا لو عندك مشوار تروحى وترجعى تانى"
و لأنى خفت اذا مشيت ورجعت ارجع الاقيهم روحوا على اساس انى معرفش مواعيد الصيف وافتركت احمد ذكى فى فيلمه تلاته فى مهمه رسميه لما راح لقا الموظفين برده مش موجدين قررت انى استنا و عدت الساعه وانا واقفه بس الحقيقه انها بقت ساعه ونص و اخيرا جالى الموظف المنتظر و راح باصص فى الورقه وقالى كله كويس بس ناقص على امضه من موظف فى مكان تانى قلت ماشى و رحت جرى المكان ال قالى عليه و دخلت بس المره دى المكان كان زحمه ووصلت لمكتب الموظف وسالت عليه لقيتهم بيقولوا الموظف ده بيجى الساعه 11 و بصراحه مبقتش عارفه اقول ايه ولا اعمل ايه
تسعه مواعيد الصيف على اساس ايه مش عارفه و قلنا ماشى طيب و 11 دى ايه ؟؟! و طبعا لان الساعه بقت عشره ونص قررت امشى اروح شغلى وابقا اشوف الموضوع يوم تانى و مشيت وانا بقول لنفسى عمااااااااااااااااار يا مصر
هناك تعليقان (2):
السلام عليكم ورحمة الله وبركاته
طبعا مفيش كلام ان اي مشوار لأي مصلحة حكومية ده طبعا كابوس وكابوس فظيع فظيع لأني يا ما عانيت من المواقف دي والطوابير الرهيبة والغريبة لأن في اغلب الأوقات في الطوابير دي بيكون في حاجة من الأتنين لازم يكونوا موجودين وهما اما انا الطابور واقف ميمشيش ابدا وده بسبب ان كل واحد يجي من بره الطابور ويجبله واسطه وكوسه مهببه عليه وعلى عينه علشان ورقه يخلص وسعت البيه او الست هانم ميقفوش في الدور والحاجة التانيه ان عندنا موظفين ماشاء الله لاقوة الا بالله سرعة مفيش كده ايه السرعة دي لدرجة ان الواحد ممكن يسابق الكمبيوتر وهو ده الحلم اللي بجد وهو ده الحلم المستحيل
وعادي جدا ممكن تلاقي المظف مشغول بتليفون اوهزار مع زميله ومشمهم الناس ابدابدا .
واللي انا عرفته واتأكدت منه ان احنا فعلا في بلد حكومتها كل همها هي استنفاذ لطاقة الشعب الغلبان جسديا وعقليا وزهنيا وطبعا طبعا ماديا وكل اللي اقدر اقوله واعمل مع العالم دي حاجتين اولا ربنا يهديهم
ثانيا حسبي الله ونعم الوكيل حسبي الله ونعم الوكيل حسبي الله ونعم الوكيل فيك يا........ ولا بلاش ربنا ياخد اللي كان السبب
(اواللي انا عرفته واتأكدت منه ان احنا فعلا في بلد حكومتها كل همها هي استنفاذ لطاقة الشعب الغلبان جسديا وعقليا وزهنيا وطبعا طبعا ماديا وكل اللي اقدر اقوله واعمل مع العالم دي حاجتين اولا ربنا يهديهم
ثانيا حسبي الله ونعم الوكيل حسبي الله ونعم الوكيل حسبي الله ونعم الوكيل )موافقه كليه و اتمنى ان حلمك بانك تسابق الكومبيوتر يتحقق ويبقا حقيقه يمكن الوضع يبقا احسن
إرسال تعليق